ألعاب الجوال كثيرة وكل أسبوع يتوفر عشرات من الألعاب في ستور قوقل بلاي للأندرويد أو آبل, لكن ليس كلها ممكن يعجبك لأنه يمكن بعضها يحتاج وقت حتى تتقدم باللعبة ويبدأ الحماس والمتعة فيها وبعضها ممكن يمنعك منها لأنها بفلوس أصلا أو الشيء الي يرفع الضغط إنك لازم تدفع علشان تلفل!
قائمة اختياراتي بناء على 5 أمور هي:
- تدخل بجوها بسرعة
- ما ترفع ضغطك أنه لازم تشتري بفلوس علشان تستمتع!
- مجانية وتسبب الإدمان
- سهله التحكم
Motion Tennis Cast – أندرويد
اختصر لكم فكرة هاللعبة كأنك تلعب تنس على جهاز Wii لكنك تستخدم جوالك وتقدر حتى تلعب أونلاين ضد أخوياك! كل الي تحتاجه إنك تركز شوي بطريقة تشغليها سواء على شاشتك أو متصفحك باللابتوب. وتتطلب إذا أردت تشغيلها بتفعيل خاصية “Miracast” من جوالك.
- لو تشغلها على شاشتك (فقط HDTV و Smart TV): تتطلب تفعل ميزت “AllShareCast” والي تسمح لك تعرض جوالك على الشاشة.
- لو تشغلها على متصفح كروم بجهازك: تحتاج تحمل تطبيق ‘AllCast Receiver’ من ستور الكروم + تحمل تطبيق “Mirror Beta” من قوقل بلاي لجوالك.
- للابتوب: لازم تصير شابك جوالك واللابتوب على نفس شبكة الواي فاي ثم شغل تطبيق “Mirror Beta” من جوالك واختر لابتوبك من القائمة .. والعب.
Zombie Highway 2 – أندرويد / آيفون
مبدأ إنك تتفن بقتل الزومبيز هذا شيء لوحده ممتع وأيضا بساطة تحكمها الي بتزيد متعتك بحيث أنه يوجد سيارة تسير تلقائي وأنت عليك فقط تهتم بالزومبي الي يتعلّق على سيارتك من جميع الاتجاهات. بيكون عندك أسلحة وتطويرات تضبط فيها سيارتك لأنها كلما تتقدم باللعبة كما يظهر لك أنواع زومبي بقدرات مختلفة مثل زومبي ثقيل يتسبب أنك ماتقدر تسيطر على سيارتك بشكل سهل.
Micro Machines – آيفون
كثير منا يتذكر هذي اللعبة سواء لعبتها على بلايستيشن 2 أو قبل وهي حرب سيارات وسباق بنفس الوقت وتستخدم فيها اسلحة علشان تقضي على خصمك وتفوز بالسباق. ميزة نسخة الآيفون أنها تتضمن طور (الأرينا) أو ساحة كبيرة تواجه فيها منافسيك وتكسر سياراتهم. وميزتها إنها تتضمن حوالي 80 سيارة مختلفة وأكثر من 100 تطوير للأسلحة والدروع وأكثر.
والي يحمسك لها أكثر ويسبب الإدمان أنها أونلاين وتقدر أنت واخوياك باستراحة تلعبون ضد بعض وكلما تحصل تروفي كلما تحصل على بكجات تفتحها وفيها أسلحة وتطويرات ومميزات أقوى.
Does not commute -- أندرويد \ آيفون
فكرة اللعبة مجنونة شوي! الهدف إنك تقود سيارتك من نقطة ( أ ) إلى ( ب ) بأسرع وقت وتتجنب إنك تصدم بأي شيء لأنه راح يأخرك. لكن المميز فيها أنه كل سيارة تقودها سواء سريعة أو باص أو شرطة وغيره عبر المراحل الأولى سيسجل وتظهر لك بالشوارع (بنفس الطريق وطريقة القيادة بالضبط) يعني إذا توصل مستوى 20 بتشوف أمامك 20 سيارة مختلفة تسير بالشوارع وتتحاول تتجنبها.
لذلك خلك من البداية حريص وذكي باختيار الطرق الي تسير من خلالها فهي لعبة سيارات استراتيجية. والفيديو يوضح لك أكثر.
Wire Defuser – أندرويد \ آيفون
كثير من ألعاب الألغاز كأنها تقولك” خذ وقتك طال عمرك وحل اللغز بدون أي ضغوط! لكن هذي اللعبة ماراح تنتظرك وبتخليك على أعصابك طول الوقت بوظيفتك الي هي تعطيل القنابل! فيه هناك أكثر من 80 تحدي وبعد ما تخلص أيضا تفتح طور الهاركور والي بخليك تعرف إن الله حق!
من خلال تجربة, بتشوف أن كل لغز فعليا يقدم لك تجربة جديدة وأفكار واسلاك وأزرار تحتاج منك ثلاث أشياء (تكون هادئ, تفكر بمنطقية, ردة فعل سريعة).
بالنهاية, أتمنى القائمة تكون مقنعة لك وشخصيا أنصحك تحلمها وتجربها لأنها مجانية بالنهاية 🙂
